“The Telegraph” nəşrində yayımlanan məqalədə, Pekinin Rusiya-Ukrayna müharibəsinin bitimində maraqlı olmadığı yazılıb. Məqalədə vurğulanıb ki, Tramp administrasiyasının Ukraynada müharibəyə son qoymaq səylərini artırarkən, Çin münaqişəni kölgədən alovlandırmaqla sülh prosesini effektiv şəkildə sabotaj edir. Bunu Çin rəsmilər heç gizlətmirlər. Çinin xarici işlər naziri Van Yi Brüsseldə görüşləri zamanı demişdi ki, əgər Rusiya müharibədə məğlub olsa, Vaşinqtonun Çinə təzyiqi artacaq. Bununla Çin rəsmisi ölkəsinin Rusiya-Ukrayna müharibəsinin davamında maraqlı olduğuna işarə etmişdi.
Çin Ukraynadakı savaşa əsas rəqibləri – Moskvanı və Vaşinqtonu tükəndirən bir proksi müharibə kimi baxır. ABŞ Ukraynanın müdafiəsini maliyyələşdirdiyi halda, Çin Moskvanı gücləndirir – mikroelektronika, optik sistemlər, dron komponentləri və müharibə üçün vacib olan digər texnologiyaları təmin edir.
Qərbin kəşfiyyat mənbələri Çində Rusiyanın “Almaz-Antey” konserni ilə birgə hücum PUA-larının istehsalı üçün gizli müəssisə yaradıldığını bildirirlər. Görünür, bu, Pekinin daha dərin strategiyasının bir hissəsidir: Rusiyaya uzun sürən müharibə aparmağa kömək etməklə yanaşı, zahirən neytrallığı qorumaq. Qərb mənbələri Çinin iqtisadi əməkdaşlıq adı altında hər il milyonlarla barrel Rusiya nefti və qazını əksər hallarda sanksiyalardan yan keçməklə, kölgə donanması vasitəsilə idxal etdiyini vurğulayırlar. Tramp Rusiya neftinin idxalına görə Hindistana yeni 25%-lik rüsumlar tətbiq etdikdən sonra da Çin ABŞ Maliyyə Nazirliyinin 100%-lik tarif təhlükəsini belə rədd edərək, neft almağa davam edir.
Ekspertlər Moskvaya verilən bu dəstəkdə strateji hesablama görürlər: uzanan münaqişə Çinə Amerikanın silah ehtiyatlarını və 2027-ci ilə qədər real ssenari hesab edilən Tayvana potensial hücuma qarşı ABŞ-nin hazırlığını azaltmağa imkan verir.
“The Telegraph” Si Cinpinin taktikasını bu cür ifadə edir: “Vadidə iki pələng döyüşərkən, müdrik meymun dağda oturub seyr edir”. Məqalədə qeyd olunub ki, bu kontekstdə Trampın sülh təşəbbüsü təhlükə altındadır: “Onun nümayəndəsi Stiv Uitkoff Kremllə danışıqlar aparır, lakin Çin və Rusiyanın, üzdə tərəfdaş olsalar da, müharibəni davam etdirməkdə öz maraqları var. Yapon dənizində birgə hərbi dəniz təlimləri Pekin və Moskvanın sülhə hazır olmadığına daha bir işarədir”.
RU 
AZ 
EN 
TR